بلوچستان اسمبلی میں اردو کو سرکاری زبان کا درجہ دینے کی قرار داد پیش

 بلوچستان اسمبلی میں اردو کے نفاذ اور اسے سرکاری زبان کا درجہ دینے کے لیے قرار داد پیش کر دی گئی۔ قرار داد بلوچستان اسمبلی میں قائد حزب اختلاف مولانا عبدالواسع کی جانب سے پیش کی گئی۔ بلوچستان اسمبلی میں پیش کی گئی قرار داد نمبر 125 کے متن کے مطابق: ''ہر گاہ کہ سپریم کورٹ آف پاکستان نے اپنے 8 ستمبر 2015ء کے فیصلے میں سرکاری دفاتر اور تعلیمی اداروں میں اردو کو بطور سرکاری، دفتری اور تعلیمی زبان رائج کرنے کا حکم دیا تھا لیکن تا حال حکومت کی جانب سے اس سلسلے میں کوئی انتظامی حکم نامہ جاری نہیں کیا گیا ہے۔ لہٰذا یہ ایوان صوبائی حکومت سے سفارش کرتا ہے کہ وہ اردو زبان کو بطور سرکاری، دفتری اور تعلیمی زبان رائج کرنے کے سلسلے میں باقاعدہ ایک انتظامی حکم نامہ جاری کر سکے تاکہ اردو کو سرکاری زبان کا درجہ مل سکے۔